Buryn Jitiqara aýdanynyń sharýashylyqtary astyqty alys elevatorlarǵa tasıtyn. Endi Jitiqara qalasynyń irgesinde ornalasqan Prıgorodnoe selosyndaǵy soltústik shyǵys ónerkásip aımaǵynan «Jitiqara-Astyq Treıd» jaýapkershiligi shekteýli seriktestigi astyq qabyldaý beketin ashty. Ol sharýashylyqtar astyǵyn saqtap beredi. Qoımanyń jyl boıy 100 myń tonna astyq qabyldap, saqtap berýge qýaty jetedi.
Jumys saparymen osynda kelgen oblys ák imi Arhımed Muhambetov jańa astyq qabyldaý qoımasymen qatar Gúlsara Jamanqulova basqaratyn «Jitiqara-Astyq Treıd» seriktestiginiń ofısin de tamashalady. Onyń birinshi qabatynda astyq qabyldaıtyn zamanaýı tarazy onalasqan. Jumysshylar taza, jyly jerde otyryp, jumys isteıdi. Astyq qabyldaý qoımasy 15 adamǵa jumys berip otyr. Kásiporyn astyq saqtaý qoımasyn salýǵa 280 mıllıon teńge qarjy jumsady.
«Aýdanda elevatordyń jaǵdaıy qıyn boldy. Astyqty alysqa, qalaǵa tasyǵan soń, ol bıdaıdyń ózindik qunyna da keri yqpal etkeni sózsiz. Mine, jaqsy joba júzege asyryldy, endi astyqty osynda saqtap, sata beresizder» dedi Arhımed Begejanuly.
«Jitiqara-Astyq Treıd» kásiporny osy jerden taǵy bir osyndaı qoımanyń qurylysyn bastady.
Názıra Járimbet
«Egemen Qazaqstan»
Qostanaı oblysy,
Jitiqara aýdany